សកម្មជនប្រជាធិបតេយ្យដ៏ល្បីល្បាញរបស់ក្រុងហុងកុង លោក Joshua Wong ត្រូវបានតុលាការក្រុងហុងកុង កាត់ទោសដាក់ពន្ធនាគារចំនួន ១០ ឆ្នាំ នៅថ្ងៃព្រហស្បតិ៍ ទី៥ ខែវិច្ឆិកានេះ ក្រោមបទចោទប្រកាន់ «ឃុបឃិតជាមួយកម្លាំងបរទេសដើម្បីគំរាមកំហែងដល់សន្តិសុខជាតិ»។
លោក Wong ដែលលេចធ្លោក្នុងឆាកអន្តរជាតិ អំឡុង «ចលនាបាតុកម្មឆត្រ» ឬ Umbrella Movement កាលពីឆ្នាំ២០១៤ បានចំណាយពេលជិត ៦ ឆ្នាំរួចមកហើយនៅក្នុងពន្ធនាគារ ហើយតាមរយៈការកាត់ទោសនេះ លោកត្រូវបានរំពឹងថានឹងជាប់ពន្ធនាគាររហូតដល់ចុង ឆ្នាំ ២០៣៦ ខាងមុខ។
អតីតមេដឹកនាំនិស្សិតរូបនេះ ដែលទើបតែឈានចូលវ័យ ៣០ ឆ្នាំ កាលពីខែមុន ដើមឡើយត្រូវបានរំពឹងថានឹងត្រូវដោះលែងឱ្យមានសេរីភាពវិញនៅខែមករា ខាងមុខ បន្ទាប់ពីបានអនុវត្តទោសជាប់ពន្ធនាគាររយៈពេល ៤ ឆ្នាំ និង ៨ ខែ ពីបទ «ឃុបឃិតដើម្បីផ្តួលរំលំអំណាចរដ្ឋ» ក្រោមច្បាប់សន្តិសុខជាតិដែលដាក់ចេញដោយទីក្រុងប៉េកាំង។
តែទោះជាយ៉ាងណា អាជ្ញាធរក្រុងហុងកុង បានប្រើច្បាប់សន្តិសុខជាតិដដែលនេះ ដើម្បីចោទប្រកាន់លោក Wong ជាថ្មីម្តងទៀតកាលពីខែមិថុនា ឆ្នាំមុន ដោយចោទប្រកាន់រូបលោកថាបាន «ឃុបឃិតជាមួយបណ្តាប្រទេស និងអង្គភាពបរទេស» ដើម្បីជម្រុញឱ្យមានការដាក់ទណ្ឌកម្មសេដ្ឋកិច្ចលើមជ្ឈមណ្ឌលហិរញ្ញវត្ថុក្រុងហុងកុង និងប្រទេសចិន៕ អត្ថបទ៖ រិទ្ធី
