ខេត្តព្រះសីហនុបានពង្រីកការផ្សព្វផ្សាយសក្តានុពលទេសចរណ៍របស់ខ្លួនទៅកាន់ទីផ្សារអឺរ៉ុប តាមរយៈការបង្ហាញពីទេសចរណ៍កីឡា និងឱកាសហ្វឹកហាត់កីឡាប្រយុទ្ធនៅកោះរ៉ុង។ ក្នុងនោះ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានដឹកនាំគណៈប្រតិភូខេត្ត និងក្លឹប KONG MMA ចូលរួមក្នុងកម្មវិធីផ្សព្វផ្សាយ និងបង្ហាញសកម្មភាពកីឡាប្រយុទ្ធ នៅទីក្រុង Prague សាធារណរដ្ឋឆែក កាលពីថ្ងៃទី៥ ខែវិច្ឆិកា ឆ្នាំ២០២៦។ ការចូលរួមនេះមានគោលបំណងណែនាំពីសក្តានុពលរបស់កោះរ៉ុង ជាពិសេសលទ្ធភាពក្នុងការអភិវឌ្ឍជាគោលដៅទេសចរណ៍កីឡា ដែលអាចទាក់ទាញភ្ញៀវទេសចរ អ្នកហ្វឹកហាត់ និងអ្នកស្រឡាញ់វិស័យកីឡាពីបណ្តាប្រទេសនានា ឱ្យមកស្វែងយល់ពីកម្ពុជា។
ក្នុងឱកាសនោះ ក្លឹប KONG MMA បានបង្ហាញពីសកម្មភាព និងសមត្ថភាពនៃការផ្តល់សេវាហ្វឹកហាត់កីឡាប្រយុទ្ធនៅមជ្ឈមណ្ឌល KONG MMA លើកោះរ៉ុង ព្រមទាំងអញ្ជើញគ្រូបង្វឹក កីឡាករ កីឡាការិនី សិស្ស និងអ្នកចូលចិត្តហាត់កីឡាប្រយុទ្ធមកពីប្រទេសឆែក និងបណ្តាប្រទេសផ្សេងៗ ឱ្យមកចូលរួមហ្វឹកហាត់ បំប៉នសមត្ថភាព និងផ្លាស់ប្តូរបទពិសោធន៍នៅប្រទេសកម្ពុជា។ ការផ្សារភ្ជាប់ការហ្វឹកហាត់កីឡាជាមួយនឹងបរិយាកាសធម្មជាតិ និងសម្រស់ឆ្នេរសមុទ្រនៅកោះរ៉ុង អាចបង្កើតបទពិសោធន៍ទេសចរណ៍បែបថ្មី ដែលរួមបញ្ចូលទាំងការថែរក្សាសុខភាព ការអភិវឌ្ឍសមត្ថភាពកីឡា និងការសម្រាកលំហែកាយ។ លើសពីនេះ ការជួបជុំរវាងអ្នកជំនាញ និងអ្នកស្រឡាញ់កីឡាពីប្រទេសផ្សេងៗ ក៏ជាឱកាសសម្រាប់ការចែករំលែកចំណេះដឹង បច្ចេកទេស និងការពង្រឹងទំនាក់ទំនងក្នុងសហគមន៍កីឡាអន្តរជាតិផងដែរ។
ការផ្សព្វផ្សាយនៅទីក្រុង Prague មិនត្រឹមតែជាការណែនាំពីសកម្មភាពរបស់ក្លឹប KONG MMA ប៉ុណ្ណោះទេ ប៉ុន្តែថែមទាំងជាការបង្ហាញពីសក្តានុពលថ្មីរបស់ខេត្តព្រះសីហនុ ក្នុងការធ្វើពិពិធកម្មផលិតផលទេសចរណ៍ ដោយភ្ជាប់ទេសចរណ៍ធម្មជាតិជាមួយទេសចរណ៍កីឡា។ ប្រសិនបើមានការផ្សព្វផ្សាយ និងអភិវឌ្ឍបន្ថែម ទេសចរណ៍កីឡាអាចក្លាយជាចំណែកមួយក្នុងការទាក់ទាញភ្ញៀវទេសចរឱ្យស្នាក់នៅរយៈពេលវែង បង្កើតតម្រូវការសេវាកម្មក្នុងស្រុក និងបង្កើនឱកាសការងារសម្រាប់ប្រជាពលរដ្ឋ។ ជាមួយគ្នានេះ ការពង្រីកភាពជាដៃគូជាមួយសហគមន៍កីឡាអន្តរជាតិ ក៏អាចជួយលើកកម្ពស់ការស្គាល់កម្ពុជាលើឆាកអន្តរជាតិ និងបង្ហាញថាកោះរ៉ុងមិនត្រឹមតែជាគោលដៅទេសចរណ៍សមុទ្រប៉ុណ្ណោះទេ ប៉ុន្តែថែមទាំងមានសក្តានុពលជាកន្លែងហ្វឹកហាត់ និងផ្លាស់ប្តូរបទពិសោធន៍កីឡាផងដែរ។ អត្ថបទដោយ៖ សុភ័ក្រ្ត
