ជនប្លន់ពាក់ម៉ាស់កាន់កាំបិត៤នាក់បានផ្លោះរបងចូលផ្ទះនៅពេលរំលងអធ្រាត្រ គំរាមដោយកាំបិត និងចងប្ដីប្រពន្ធដើមកំណើតចិនមួយគូ រួចប្លន់យកប្រាក់ គ្រឿងអលង្ការមាស ត្បូងគ្រីស្តាល់ នាឡិកាម៉ាកល្បី និងទ្រព្យសម្បត្តិផ្សេងទៀត ដែលមានតម្លៃសរុបលើស១០ម៉ឺនរីងហ្គីត ហើយរត់គេចពីកន្លែងកើតហេតុយ៉ាងលឿន។ ជាសំណាងល្អ គ្មានសមាជិកណាម្នាក់ក្នុងគ្រួសារជនរងគ្រោះរងរបួសទេ។
ករណីនេះបានកើតឡើងនៅវេលាម៉ោងប្រមាណ២និង៣០នាទីរំលងអធ្រាត្រ ថ្ងៃទី៣១នៃខែមុន នៅផ្ទះមួយក្បែរ Ningxin Garden ក្នុងតំបន់ Tabuan Jaya ទីក្រុង Kuching រដ្ឋ Sarawak ប្រទេសម៉ាឡេស៊ី។
រូបភាពពីកាមេរ៉ាសុវត្ថិភាពដែលកំពុងចែករំលែកលើបណ្ដាញសង្គមបង្ហាញថា ជនប្លន់ទាំង៤នាក់ធ្លាប់ព្យាយាមចូលផ្ទះ២ខ្នងផ្សេងទៀតនៅក្បែរនោះ ប៉ុន្តែការប៉ុនប៉ងទាំងពីរលើកមិនបានសម្រេចទេ។ បន្ទាប់មក ពួកគេបន្តស្វែងរកគោលដៅនៅក្នុងតំបន់លំនៅឋាន រហូតដល់បានកំណត់គោលដៅលើគ្រួសារជនរងគ្រោះ។
រូបភាពបង្ហាញថា បន្ទាប់ពីបុរសទាំង៤នាក់ផ្លោះរបងចូលក្នុងបរិវេណផ្ទះ ពួកគេបានសង្កេតមើលជុំវិញប្រហែល១០នាទីសិន បន្ទាប់មកប្រើឧបករណ៍គាស់ទ្វារកញ្ចក់រុញ ហើយទម្លុះចូលក្នុងផ្ទះ។
នៅពេលកើតហេតុ ម្ចាស់ផ្ទះ ភរិយា និងកូនប្រុសអាយុ១៤ឆ្នាំកំពុងដេកលក់។ ជនប្លន់ដែលចូលមកភ្លាមៗបានដាស់គ្រួសារនេះឱ្យភ្ញាក់ និងស្រែកបង្គាប់ឱ្យពួកគេនៅស្ងៀម។ ដំបូង ម្ចាស់ផ្ទះថែមទាំងគិតថាខ្លួននៅតែកំពុងសុបិនទៀតផង។
បន្ទាប់មក ជនប្លន់បានចូលទៅក្នុងបន្ទប់គេង គំរាមគ្រួសារនេះដោយប្រើវត្ថុមុតស្រួច ដូចជាកាំបិតប៉័ងតោក្នុងផ្ទះបាយ ហើយប្រើខ្សែភ្លើងចងដៃនិងជើងប្ដីប្រពន្ធ។ ពួកគេក៏ប្រើក្រណាត់ខ្ទប់មាត់អ្នកទាំងពីរ ព្រមទាំងបង្គាប់កូនឱ្យបិទភ្នែក។
បន្ទាប់ពីធ្វើសកម្មភាពបានសម្រេច ជនប្លន់ទាំង៤នាក់បានយកប្រាក់សុទ្ធ៥.០០០រីងហ្គីត ត្បូងគ្រីស្តាល់ គ្រឿងអលង្ការមាស និងនាឡិកាម៉ាកល្បី៧គ្រឿង ដែលទ្រព្យសម្បត្តិសរុបមានតម្លៃលើស១០ម៉ឺនរីងហ្គីត។ បន្ទាប់ពីប្រាកដថាជនប្លន់បានចាកចេញ ម្ចាស់ផ្ទះបានរំដោះខ្លួនចេញពីចំណងដោយខ្លួនឯង ហើយរាយការណ៍ទៅប៉ូលិសភ្លាមៗ។ បច្ចុប្បន្ន ប៉ូលិសកំពុងបន្តស៊ើបអង្កេតករណីនេះ។
