ស្ថានីយទូរទស្សន៍ខេត្តព្រះសីហនុ ថ្ងៃទី៩ ខែសីហា៖ កាលពីម្សិលមិញ ក្រុមប្រឹក្សាសាកលវិទ្យាល័យរ៉ាមខាំហែងរបស់ថៃបានបោះឆ្នោតជាឯកច្ឆន្ទក្នុងកិច្ចប្រជុំលើកទី៩ ដើម្បីដកហូតជាផ្លូវការនូវសញ្ញាបត្របណ្ឌិតកិត្តិយសផ្នែកវិទ្យាសាស្ត្រនយោបាយដែលបានប្រគល់ជូនសម្ដេចតេជោ ហ៊ុន សែន ក្នុងឆ្នាំ២០០១។ សាកលវិទ្យាល័យបានលើកឡើងថា សកម្មភាពបច្ចុប្បន្នរបស់សម្ដេចផ្ទុយនឹងគោលការណ៍លើកកម្ពស់សន្តិភាព និងមិត្តភាព។
សារព័ត៌មានថៃ MGR Online បានរាយការណ៍កាលពីថ្ងៃទី១៣ ខែវិច្ឆិកា ឆ្នាំ២០០៩ ថា តំណាងរាស្ត្រ និងសមាជិកព្រឹទ្ធសភាថៃសរុបចំនួន៣៧នាក់បានចុះហត្ថលេខាលើលិខិតមួយជូនលោក ឆៃ ឈិតឆប ដែលពេលនោះជាប្រធានសភាថៃ។ ពួកគេបានស្នើឱ្យលោកបញ្ជូនលិខិតនោះទៅក្រុមប្រឹក្សាសាកលវិទ្យាល័យរ៉ាមខាំហែង ដើម្បីពិចារណាដកហូតសញ្ញាបត្របណ្ឌិតកិត្តិយសផ្នែកវិទ្យាសាស្ត្រនយោបាយ ដែលសាកលវិទ្យាល័យបានប្រគល់ជូនសម្ដេចតេជោ ហ៊ុន សែន ដែលកាលនោះជានាយករដ្ឋមន្ត្រីកម្ពុជា។
ក្នុងសេចក្ដីថ្លែងការណ៍ សាកលវិទ្យាល័យបានលើកឡើងថា ថ្មីៗនេះសម្ដេច ហ៊ុន សែន ក្នុងឋានៈជាប្រធានព្រឹទ្ធសភាកម្ពុជា ត្រូវបានចោទថាបានគាំទ្រសកម្មភាពហិង្សាលើពលរដ្ឋថៃ និងប៉ះពាល់ដល់អធិបតេយ្យភាពថៃក្នុងបញ្ហាព្រំដែន ដែលធ្វើឱ្យជម្លោះរវាងភាគីទាំងពីរកាន់តែធ្ងន់ធ្ងរ។ សាកលវិទ្យាល័យថា សកម្មភាពទាំងនោះផ្ទុយនឹងស្មារតីនៃការប្រគល់សញ្ញាបត្រកិត្តិយស ហើយបានសម្រេចដកហូតសញ្ញាបត្រនោះភ្លាមៗ។
នៅថ្ងៃដដែល សម្ដេចតេជោ ហ៊ុន សែន បានឆ្លើយតបតាមបណ្ដាញសង្គមថា សាកលវិទ្យាល័យមិនចាំបាច់ដកហូតសញ្ញាបត្រនោះទេ ព្រោះសម្ដេចបានបោះវាចូលក្នុងបង្គន់តាំងពីឆ្នាំ២០០៨ ជាពេលដែលសម្ដេចថា កងទ័ពថៃបានចូលឈ្លានពានប្រាសាទព្រះវិហាររបស់កម្ពុជា។ សម្ដេចថា សញ្ញាបត្រនោះគ្មានតម្លៃសម្រាប់សម្ដេចទេ ហើយចំណេះដឹងរបស់សម្ដេចបានមកពីប្រជាជនកម្ពុជា និងប្រព័ន្ធអប់រំជាតិ មិនមែនពីសាលាបរទេសណាមួយឡើយ។
រាយការណ៍សរុបដោយស្ថានីយទូរទស្សន៍ខេត្តព្រះសីហនុ។
