អគ្គិភ័យដ៏សែនរន្ធត់មួយ បានឆាបឆេះយ៉ាងសន្ធោសន្ធៅលើអគារលំនៅឋានមួយកន្លែងស្ថិតនៅភាគខាងជើងប្រទេសចិន បណ្តាលឱ្យមនុស្សយ៉ាងហោចណាស់ ១៤ នាក់បាត់បង់ជីវិត នេះបើយោងតាមការចុះផ្សាយរដ្ឋចិននៅថ្ងៃចន្ទ ទី ៩ ខែវិច្ឆិកានេះ។
ទីភ្នាក់ងារសារព័ត៌មានរដ្ឋ Xinhua បានរាយការណ៍ថា អគ្គិភ័យដ៏សាហាវនេះ កើតឡើងនៅក្នុងអគារមួយកន្លែងស្ថិតក្នុងទីក្រុង តៃយួន ខេត្តសានស៊ី ដោយមនុស្សចំនួន ១៤ នាក់បានបាត់បង់ជីវិត ហើយតាមរបាយការណ៍មុននេះ មនុស្សសរុប ៣៨ នាក់ ត្រូវបានបញ្ជូនទៅកាន់មន្ទីរពេទ្យដើម្បីទទួលការព្យាបាល ខណៈដែលមូលហេតុពិតប្រាកដ ដែលបណ្តាលឱ្យមានការឆាបឆេះនេះ បច្ចុប្បន្នកំពុងស្ថិតក្រោមការស៊ើបអង្កេត។
គួរបញ្ជាក់ផងដែរថា គ្រោះអគ្គិភ័យ ជាញឹកញាប់តែងតែកើតមានឡើងនៅក្នុងប្រទេសចិន ខណៈដែលមូលហេតុចម្បងគឺបណ្តាលមកពីការអនុវត្តបទដ្ឋានសំណង់ធូររលុង និងការមិនសូវយកចិត្តទុកដាក់ ឬធ្វេសប្រហែសចំពោះសុវត្ថិភាពការងារ និងសុវត្ថិភាពអគារ៕ អត្ថបទ៖ រិទ្ធី
