ចុងសប្តាហ៍កន្លងទៅនេះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានដឹកនាំគណៈប្រតិភូចុះទស្សនកិច្ចនៅតំបន់សេដ្ឋកិច្ចពិសេស ឈីលូ ជាន ពុ ចាយ និង ហ័រស៊ាំង អ៊ិនធើណេសិនណល ដើម្បីពិនិត្យវឌ្ឍនភាពនៃការអភិវឌ្ឍ និងប្រតិបត្តិការផ្ទាល់។
ក្នុងឱកាសនោះ ឯកឧត្តមបានគូសបញ្ជាក់ពីចំណុចសំខាន់ៗ ដោយតំបន់សេដ្ឋកិច្ចពិសេសជាគំនិតផ្តួចផ្តើមរបស់ សម្តេចតេជោ ហ៊ុន សែន ដែលបានប្រែប្រួលដីទំនេរឱ្យទៅជាតំបន់ឧស្សាហកម្ម ដោយធ្វើពិពិធកម្មពីឧស្សាហកម្មប្រើប្រាស់កម្លាំងពលកម្ម ទៅជាឧស្សាហកម្មបច្ចេកវិទ្យាដែលមានតម្លៃបន្ថែមខ្ពស់។
ផ្អែកតាមអនុសាសន៍របស់ សម្តេចតេជោ ហ៊ុន សែន និង សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជំរុញឱ្យមានការកែច្នៃកសិផល និងវត្ថុធាតុដើមក្នុងស្រុកជាអតិបរមា ជាពិសេសការប្រើប្រាស់ជ័រកៅស៊ូក្នុងស្រុកសម្រាប់រោងចក្រផលិតសំបកកង់រថយន្ត ដើម្បីបង្កើតតម្លៃបន្ថែម និងពង្រឹងខ្សែច្រវាក់ផ្គត់ផ្គង់ក្នុងស្រុកឱ្យកាន់តែរឹងមាំ។
បច្ចុប្បន្ន កម្ពុជាមានតំបន់សេដ្ឋកិច្ចពិសេសកំពុងដំណើរការចំនួន ៣៩ តំបន់ ដែលមានគម្រោងវិនិយោគសរុប ១.១៤៩ គម្រោង ក្នុងទុនវិនិយោគប្រមាណ ១៥ ប៊ីលានដុល្លារអាម៉េរិក និងបានបង្កើតឱកាសការងារជូនប្រជាពលរដ្ឋជិត ២៧ ម៉ឺនកន្លែង៕ ដោយ៖ ប៉ៃ សុឃីម
