ក្រសួងការបរទេសកូរ៉េខាងត្បូងបានបញ្ជាក់ថ្មីៗថា ពលរដ្ឋចំនួន ៨០ នាក់បាត់ដំណឹងនៅកម្ពុជា អាចពាក់ព័ន្ធនឹងបណ្តាញឆបោកតាមអ៊ីនធឺណិតឆ្លងដែនដែលកំពុងរីកធំ។ មន្ត្រីកូរ៉េថា ចាប់ពីខែមករា ឆ្នាំ២០២៥ មានមនុស្សសរុប ៣៣០ នាក់ត្រូវបានរាយការណ៍ថាបាត់ខ្លួន ក្នុងនោះមួយចំនួនអាចរងការជួញដូរ បង្ខំឱ្យធ្វើការ ឬបង្ខំចូលរួមការឆបោក។
តាមរបាយការណ៍ ជនរងគ្រោះភាគច្រើនត្រូវបានអូសទាញដោយការផ្សាយពាណិជ្ជកម្មការងារក្លែងក្លាយ ហើយត្រូវបានក្រុមឆបោកគ្រប់គ្រងក្នុងអ្វីដែលហៅថា «មជ្ឈមណ្ឌលប្រតិបត្តិការអនឡាញ» និងបង្ខំឱ្យចូលរួមសកម្មភាពខុសច្បាប់។ អ្នកនាំពាក្យក្រសួងការបរទេសកូរ៉េខាងត្បូងបានពិពណ៌នាថា នេះជាបញ្ហាប្រព័ន្ធកំពុងរីកធំ មិនមែនជាករណីដាច់ដោយឡែកទេ។
ការស្លាប់របស់និស្សិតកូរ៉េខាងត្បូងម្នាក់នៅកំពត កាលពីពេលមុនក្នុងឆ្នាំ២០២៥ បានធ្វើឱ្យមានការភ្ញាក់ផ្អើលនៅកូរ៉េ។ ជនសង្ស័យជាតិចិនពាក់ព័ន្ធការឆបោកត្រូវបានចោទថាបានចាប់ជំរិតនិងសម្លាប់និស្សិតរូបនេះ ដែលធ្វើឱ្យមានការយកចិត្តទុកដាក់លើមជ្ឈមណ្ឌលឆបោកនៅកម្ពុជា។
កូរ៉េខាងត្បូងបានបញ្ជូនក្រុមស៊ើបអង្កេតពិសេសមកសហការជាមួយនគរបាលកម្ពុជាតាមរកអ្នកបាត់ខ្លួននិងបង្ក្រាបបណ្តាញឧក្រិដ្ឋកម្ម។ តាមការប៉ាន់ប្រមាណក្នុងរបាយការណ៍ អាចមានពលរដ្ឋកូរ៉េខាងត្បូងដល់ ១០០០ នាក់នៅក្នុងកន្លែងឆបោកនៅកម្ពុជា ដោយខ្លះធ្វើការដោយស្ម័គ្រចិត្ត និងខ្លះត្រូវបានបង្ខំឱ្យនៅ។
លោក ទូច សុខៈ អ្នកនាំពាក្យក្រសួងមហាផ្ទៃបានប្រាប់កាសែតខ្មែរថាមថា មានជនជាតិកូរ៉េខាងត្បូងចំនួន ៨០ នាក់ស្ថិតក្រោមការឃុំខ្លួនរបស់អន្តោប្រវេសន៍ ប៉ុន្តែស្ថានភាពមិនសាមញ្ញទេ។ លោកថា ទោះមានស្ថានទូតផ្តល់ជំនួយ ក៏ពួកគេបដិសេធមិនត្រឡប់ទៅប្រទេសដើម ហើយអាជ្ញាធរសង្ស័យថាមានការគ្រប់គ្រង ឬសម្ពាធផ្លូវចិត្តកាន់តែជ្រៅ។
លោកថា មិនទាន់ច្បាស់ថា មនុស្សចំនួន៨០នាក់ដែលកំពុងឃុំខ្លួន គឺជាមនុស្សដូចគ្នានឹងបញ្ជីអ្នកបាត់ខ្លួនរបស់ក្រសួងការបរទេសកូរ៉េខាងត្បូងឬអត់ទេ។ កូរ៉េបានធ្វើបច្ចុប្បន្នភាពការណែនាំសុវត្ថិភាព ដោយព្រមានកុំឱ្យពលរដ្ឋទៅតំបន់ភ្នំបូកគោ ខេត្តកំពត ក្រុងបាវិត និងក្រុងប៉ោយប៉ែត ដែលមានសកម្មភាពឆបោក។
ស្ថានីយទូរទស្សន៍ចងក្រងសេចក្តីរាយការណ៍។
