ប្រធានព្រឹទ្ធសភា សម្តេច ហ៊ុន សែន កាលពីពេលថ្មីៗនេះ បានបង្ហោះសារលើបណ្តាញសង្គម ដោយសម្តែងការខកចិត្តយ៉ាងខ្លាំងចំពោះវីដេអូមួយដែលចែកចាយតាមអនឡាញ បង្ហាញមនុស្សដុតទំនិញថៃ ហើយអំពាវនាវឱ្យក្រុមពាក់ព័ន្ធបញ្ឈប់អំពើជ្រុលនិយមបែបនេះជាបន្ទាន់។
សម្តេចថា បានមើលវីដេអូប្រវែង៨នាទី បង្ហាញមនុស្សមួយក្រុមអំពាវនាវឱ្យធ្វើពហិការមិនប្រើទំនិញថៃ និងដុតបំផ្លាញទំនិញ។ សម្តេចបានរិះគន់ការដុតទំនិញ និងជេរប្រមាថអាជីវករដែលលក់ទំនិញថៃមិនទាន់អស់ ថាអំពើនេះហួសពីស្នេហាជាតិ និងជាភាពជ្រុលនិយមខ្លាំង។
សម្តេចថា សព្វថ្ងៃប្រជាជនកម្ពុជាស្ទើរតែ៩៩% ទាំងក្នុងនិងក្រៅប្រទេស កំពុងធ្វើពហិការមិនប្រើទំនិញថៃ។ ប៉ុន្តែបើអាជីវករមានទំនិញនៅសល់ ហើយមិនអាចលក់ តើគួរធ្វើដូចម្តេច? សម្តេចថា «បើអ្នកទាំងនេះមានប្រាក់ ការទិញទំនិញយកទៅធ្វើចំណីសត្វ ក៏ល្អជាងដុតដូចក្នុងវីដេអូ»។
សម្តេច ហ៊ុន សែន បានអំពាវនាវឱ្យក្រុមពាក់ព័ន្ធបញ្ឈប់ «អំពើល្ងង់ខ្លៅ» នេះជាបន្ទាន់ ហើយរួមគ្នាថែរក្សាវប្បធម៌ សីលធម៌ និងសេចក្តីថ្លៃថ្នូររបស់ជាតិ។
ស្ថានីយយើងស្រង់និងចងក្រងព័ត៌មាន
