កាលពីពេលថ្មីៗនេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា លោក ឌិត ទីណា បានជួបលោកស្រី Sun Meijun ប្រធានរដ្ឋបាលគយទូទៅចិន នៅទីក្រុងសៀងហៃ។ ភាគីទាំងពីរបានឯកភាពពន្លឿនការនាំចេញកសិផលកម្ពុជាទៅចិន និងសម្រួលនីតិវិធីនាំចេញ។ កិច្ចសហការផ្តោតលើអង្ករសម្រូប ម្នាស់ ខ្នុរ ធុរេនកក មៀន សាច់ចម្អិនរួច សំបុកត្រចៀកកាំ និងចំណីសត្វ។
ភាគីទាំងពីរក៏បានបង្កើតក្រុមការងាររួម ដើម្បីធានាឱ្យស្ថាប័នពាក់ព័ន្ធទាក់ទងគ្នាដោយផ្ទាល់ និងដោះស្រាយឧបសគ្គនាំចេញទាន់ពេល។ កសិដ្ឋានតូចៗនៅកម្ពុជាដែលអនុវត្តកសិកម្មល្អ អាចប្រើនីតិវិធីចុះបញ្ជីរបស់គយចិន ដើម្បីនាំកសិផលចូលទីផ្សារ។
ក្រសួងកសិកម្ម រុក្ខាប្រមាញ់ និងនេសាទកម្ពុជាថា កិច្ចសហការនេះនឹងផ្តល់ច្រកនាំចេញកាន់តែរលូន និងមានប្រសិទ្ធភាពដល់កសិករ និងវិស័យឯកជន។ ក្រសួងអំពាវនាវឱ្យគោរពការអនុវត្តកសិកម្មល្អ (GAP) និងការអនុវត្តផលិតកម្មល្អ ក្នុងការកែច្នៃ វេចខ្ចប់ រក្សាទុក និងដឹកជញ្ជូន ដើម្បីធានាសុវត្ថិភាពម្ហូបអាហារ និងបង្កើនភាពប្រកួតប្រជែងអន្តរជាតិរបស់កសិផលកម្ពុជា។
លោក Suy Kokthean ប្រធានសមាគមត្រចៀកកាំខ្មែរ ថា ទស្សនវិស័យនាំចេញសំបុកត្រចៀកកាំមានភាពល្អប្រសើរ ហើយចិនកំពុងជំរុញការនាំចេញឱ្យលឿន។ ប៉ុន្តែថ្មីៗនេះ តម្លៃសំបុកត្រចៀកកាំគុណភាពទាបបានធ្លាក់ចុះ ខណៈប្រភេទគុណភាពខ្ពស់ធ្លាក់ចុះតែបន្តិច។
ស្ថានីយយើងស្រង់និងចងក្រងព័ត៌មាន
