នៅថ្ងៃទី៣១ ខែធ្នូ ក្រសួងប្រៃសណីយ៍ និងទូរគមនាគមន៍បានចេញសេចក្តីប្រកាសបញ្ជាក់ថា ចាប់ពីខែមករា ឆ្នាំ២០២៦ កម្ពុជាបានចាប់ផ្តើមដាក់ឱ្យប្រើសេវាទូរស័ព្ទចល័តជំនាន់ទី៥ ឬ5Gជាផ្លូវការទូទាំងប្រទេស ដែលសម្គាល់ដំណាក់កាលថ្មីនៃហេដ្ឋារចនាសម្ព័ន្ធទំនាក់ទំនង និងការអភិវឌ្ឍឌីជីថលរបស់កម្ពុជា។
សេចក្តីប្រកាសបានឱ្យដឹងថា រាជរដ្ឋាភិបាលកម្ពុជាបានសម្រេចជាផ្លូវការនៅថ្ងៃទី៥ ខែធ្នូ ឆ្នាំ២០២៥ អនុញ្ញាតឱ្យចាប់ផ្តើមប្រតិបត្តិការសេវាទូរស័ព្ទចល័ត5Gចាប់ពីខែមករា ឆ្នាំ២០២៦។ ដើម្បីធានាឱ្យការដាក់សេវាជាពាណិជ្ជកម្មប្រព្រឹត្តទៅដោយរលូន ក្រសួងបានសហការយ៉ាងជិតស្និទ្ធជាមួយប្រតិបត្តិករទូរស័ព្ទចល័តធំៗទាំងបី គឺCellcard Metfone និងSmart ក្នុងការកសាង និងដាក់ពង្រាយបណ្តាញ5G។
ក្រោមការរៀបចំដាក់ពង្រាយនេះ ប្រតិបត្តិករបានពន្លឿនការសាងសង់ស្ថានីយទូរគមនាគមន៍ និងអង់តែន ព្រមទាំងបានបញ្ចប់ការដំឡើងឧបករណ៍5Gនៅតំបន់អាទិភាព តាមផែនទីគ្របដណ្តប់ដែលភ្ជាប់ជាមួយសេចក្តីប្រកាស ដើម្បីផ្តល់ការត្រៀមខាងបច្ចេកទេសចាំបាច់សម្រាប់ការចាប់ផ្តើមសេវា។
ក្រសួងបានបញ្ជាក់ថា ចាប់ពីម៉ោង០០:០១នាទី ថ្ងៃទី១ ខែមករា ឆ្នាំ២០២៦ អ្នកប្រើប្រាស់នៃប្រតិបត្តិករទាំងបីអាចប្រើសេវា5Gនៅក្នុងតំបន់គ្របដណ្តប់ដំបូង។ ដំណាក់កាលទី១រួមមានតំបន់អាទិភាពនៅរាជធានីភ្នំពេញ និងខេត្តព្រះសីហនុ សៀមរាប កណ្ដាល ស្វាយរៀង កំពង់ស្ពឺ តាកែវ កំពង់ចាម កំពង់ធំ ព្រៃវែង ក្រចេះ កំពង់ឆ្នាំង ពោធិ៍សាត់ ស្ទឹងត្រែង និងកំពត។
សេចក្តីប្រកាសក៏បានសង្កត់ធ្ងន់ថា បណ្តាញ5Gនឹងត្រូវពង្រីកជាបន្តបន្ទាប់តាមដំណាក់កាលដែលបានគ្រោងទុក ហើយនៅពេលខាងមុខនឹងបន្តទៅតំបន់ផ្សេងទៀតទូទាំងប្រទេស ដើម្បីផ្តល់សេវាចល័តឱ្យបានទូលំទូលាយ មានស្ថិរភាព និងល្បឿនលឿន គាំទ្រសេដ្ឋកិច្ចឌីជីថល ពន្លឿនការអភិវឌ្ឍទីក្រុងឆ្លាតវៃ និងការប្រើប្រាស់បច្ចេកវិទ្យាព័ត៌មាន ព្រមទាំងលើកកម្ពស់សមត្ថភាពប្រកួតប្រជែងរួមរបស់ប្រទេស។
រាយការណ៍សរុបដោយស្ថានីយនេះ។
