ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានយាងចាកចេញពីកម្ពុជានៅថ្ងៃទី១ ខែកញ្ញា ទៅកាន់ទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាពជាប្រចាំ និងពិគ្រោះជាមួយក្រុមគ្រូពេទ្យ។
យោងតាមសេចក្តីប្រកាសរបស់ព្រះបរមរាជវាំងដែលបានចេញផ្សាយមុននេះ ក្នុងអំឡុងពេលព្រះមហាក្សត្រយាងទៅប្រទេសចិន សម្តេចតេជោ ហ៊ុន សែន ប្រធានព្រឹទ្ធសភា បំពេញភារកិច្ចជាប្រមុខរដ្ឋស្តីទី។
ជាទូទៅ ព្រះមហាក្សត្រ និងសម្តេចព្រះវររាជមាតាជាតិខ្មែរ យាងទៅប្រទេសចិនពីរដងក្នុងមួយឆ្នាំ ដើម្បីពិនិត្យព្រះរាជសុខភាព និងពិគ្រោះជាមួយគ្រូពេទ្យ ដោយមានក្រុមគ្រូពេទ្យចិនជាអ្នកទទួលបន្ទុកថែទាំ។ កាលពីខែកុម្ភៈឆ្នាំនេះ ព្រះអង្គទាំងទ្វេក៏បានយាងទៅទីក្រុងប៉េកាំងដើម្បីពិនិត្យព្រះរាជសុខភាពផងដែរ។
កាលពីខែមេសាឆ្នាំនេះ ព្រះមហាក្សត្របានបង្ហាញព័ត៌មានអំពីព្រះរាជសុខភាព និងទទួលការព្យាបាល ហើយបានយាងត្រឡប់មកកម្ពុជាវិញនៅខែកក្កដា។ ព្រះអង្គក៏ធ្លាប់ថ្លែងអំណរគុណដល់ភាគីចិន ចំពោះក្រុមអ្នកជំនាញវេជ្ជសាស្ត្រចិនដែលបានផ្តល់ការព្យាបាល និងថែទាំព្រះរាជសុខភាពដល់ព្រះរាជវង្សកម្ពុជាជាយូរមកហើយ។
ព្រះរាជវង្សកម្ពុជាមានទំនាក់ទំនងមិត្តភាពជិតស្និទ្ធជាមួយចិនជាយូរមកហើយ។ ព្រះមហាក្សត្រធ្លាប់មានព្រះរាជបន្ទូលថា ព្រះអង្គជឿជាក់ថា ប្រទេសទាំងពីរនឹងបន្តពង្រឹងមិត្តភាពប្រពៃណី និងកិច្ចសហប្រតិបត្តិការលើវិស័យនានា។ ចាប់តាំងពីបង្កើតទំនាក់ទំនងការទូតនៅឆ្នាំ១៩៥៨មក កិច្ចសហប្រតិបត្តិការលើវិស័យនយោបាយ សេដ្ឋកិច្ច ពាណិជ្ជកម្ម វិនិយោគ វប្បធម៌ និងអប់រំ បានបន្តរីកចម្រើន ហើយទំនាក់ទំនងទ្វេភាគីកាន់តែស៊ីជម្រៅ។
