តុលាការមជ្ឈត្តការអចិន្ត្រៃយ៍ (PCA) បានចេញសេចក្តីប្រកាសនៅថ្ងៃទី ៩ ខែកញ្ញា បញ្ជាក់ថា គណៈកម្មការផ្សះផ្សារវាងកម្ពុជា និងថៃ ដែលបង្កើតឡើងតាមឧបសម្ព័ន្ធទី ៥ នៃអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) នឹងបើកកិច្ចប្រជុំលើកដំបូងជាមួយគណៈប្រតិភូប្រទេសទាំងពីរនៅសិង្ហបុរី ចាប់ពីថ្ងៃទី ១៤ ដល់ថ្ងៃទី ១៦ ខែកញ្ញា។ កិច្ចប្រជុំនេះជាជំហានជាក់ស្តែងមួយក្នុងដំណើរការផ្សះផ្សាវិវាទសមុទ្ររវាងប្រទេសទាំងពីរ។
បន្ទាប់ពីថៃបានបញ្ចប់ជាឯកតោភាគីនូវអនុស្សរណៈនៃការយោគយល់គ្នាដែលប្រទេសទាំងពីរបានចុះហត្ថលេខាក្នុងឆ្នាំ ២០០១ កម្ពុជាបានចាប់ផ្តើមនីតិវិធីផ្សះផ្សាជាកាតព្វកិច្ចនៅថ្ងៃទី ២ ខែមិថុនាឆ្នាំនេះ។ ថៃបានឆ្លើយតបនៅថ្ងៃទី ១៩ ខែមិថុនា ហើយ PCA ត្រូវបានប្រគល់តួនាទីជាលេខាធិការដ្ឋានសម្រាប់នីតិវិធីនេះ។
គណៈកម្មការផ្សះផ្សាមានអ្នកជំនាញច្បាប់អន្តរជាតិ ៥ រូប មកពីអូស្ត្រាលី ដាណឺម៉ាក បារាំង អាហ្វ្រិកខាងត្បូង និងអាល្លឺម៉ង់។ នៅព្រឹកថ្ងៃទី ១៥ ខែកញ្ញា ភាគីទាំងពីរនឹងថ្លែងសុន្ទរកថាបើក ដែលនឹងផ្សាយផ្ទាល់ជាសាធារណៈជាភាសាខ្មែរ អង់គ្លេស និងថៃ។
គណៈប្រតិភូកម្ពុជានឹងដឹកនាំដោយឧបនាយករដ្ឋមន្ត្រី និងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន និងលោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន។ លោក ប្រាក់ សុខុន នឹងថ្លែងសុន្ទរកថាបើកតំណាងកម្ពុជា។
ក្រសួងការបរទេសកម្ពុជាបានបញ្ជាក់ថា ច្បាប់អន្តរជាតិជាមូលដ្ឋានសម្រាប់ដោះស្រាយវិវាទអន្តរជាតិដោយសន្តិវិធី។ កម្ពុជានឹងចូលរួមដោយសុឆន្ទៈ និងស្មារតីសហការ ព្រមទាំងបន្តដោះស្រាយការខ្វែងគំនិតតាមផ្លូវច្បាប់ និងកិច្ចសន្ទនា ដើម្បីរក្សាសន្តិភាព និងស្ថិរភាពក្នុងតំបន់។