ថវិកា៦,០០០ដុល្លារ ជួយកុមារកម្ពុជា១៥នាក់ឱ្យមានស្នាមញញឹមឡើងវិញ

នៅថ្ងៃទី១៨ ខែកញ្ញា Quantum Charity (量子慈善) បានបរិច្ចាគថវិកាចំនួន៦,០០០ដុល្លារអាមេរិកដល់មូលនិធិ Smile Cambodia ដើម្បីជួយកុមារកម្ពុជាចំនួន១៥នាក់ឱ្យទទួលបានការវះកាត់ព្យាបាលមាត់ឆែប និងក្រអូមមាត់ឆែប។ សប្បុរសជនជាង៦០នាក់បានចូលរួមបរិច្ចាគយ៉ាងសកម្ម ដោយសង្ឃឹមថាសកម្មភាពជាក់ស្តែងនេះនឹងជួយកុមារឱ្យមានទំនុកចិត្ត និងស្នាមញញឹមឡើងវិញ។
នៅថ្ងៃដដែល តំណាង Quantum Charity និងតំណាងគម្រោងសប្បុរសធម៌ «ស្ពានមិត្តភាព» របស់ចិន បានទៅកាន់មូលនិធិ Smile Cambodia នៅមន្ទីរពេទ្យមិត្តភាពខ្មែរ-សូវៀត ដើម្បីសួរសុខទុក្ខកុមារក្រោយការវះកាត់ និងស្វែងយល់អំពីការអនុវត្តគម្រោងសប្បុរសធម៌ពាក់ព័ន្ធ។
មូលនិធិ Smile Cambodia បានឱ្យដឹងថា ខ្លួនបានធ្វើសកម្មភាពសប្បុរសធម៌នៅកម្ពុជាអស់រយៈពេល២០ឆ្នាំមកហើយ។ ដោយមានការគាំទ្រពីគ្រប់មជ្ឈដ្ឋាន មូលនិធិបានផ្តល់ការវះកាត់ដោយឥតគិតថ្លៃដល់កុមារជាង៧,០០០នាក់ ដើម្បីព្យាបាលមាត់ឆែប ក្រអូមមាត់ឆែប និងភាពមិនប្រក្រតីផ្សេងទៀតនៅលើផ្ទៃមុខ។
មូលនិធិបានបញ្ជាក់ថា មាត់ឆែប និងក្រអូមមាត់ឆែបជាបញ្ហាពីកំណើត ប៉ុន្តែកុមារភាគច្រើនអាចទទួលបានការកែលម្អប្រកបដោយប្រសិទ្ធភាព ប្រសិនបើបានទទួលការព្យាបាលទាន់ពេលនៅអាយុសមស្របសម្រាប់ការវះកាត់។ សម្រាប់កុមារទាំងនេះ ការវះកាត់មួយលើកមិនត្រឹមតែផ្លាស់ប្តូររូបរាងប៉ុណ្ណោះទេ ប៉ុន្តែក៏អាចផ្តល់ឱកាសថ្មីៗសម្រាប់ជីវិតនាពេលអនាគតផងដែរ។
នេះជាលើកទីពីរហើយដែល Quantum Charity បានចូលរួមក្នុងគម្រោងវះកាត់សប្បុរសធម៌របស់ Smile Cambodia ដោយថវិកាបរិច្ចាគសរុបបានកើនដល់១៦,០០០ដុល្លារអាមេរិក។ Quantum Charity បានឱ្យដឹងថា ខ្លួននឹងបន្តប្រមូលផ្តុំកម្លាំងសប្បុរសជននៅកម្ពុជា ដើម្បីជួយអ្នកដែលត្រូវការជំនួយកាន់តែច្រើន តាមរយៈសកម្មភាពសប្បុរសធម៌ និងជំរុញការផ្លាស់ប្តូរមិត្តភាពរវាងប្រជាជនចិន និងកម្ពុជា។