ស្ថានីយទូរទស្សន៍ខេត្តព្រះសីហនុ ថ្ងៃទី៣១ ខែកក្កដា៖ ក្រសួងការពារជាតិកម្ពុជាបានជូនដំណឹងនៅព្រឹកថ្ងៃទី៣១ ខែកក្កដាថា កងទ័ពថៃបានចាប់ខ្លួនទាហានកម្ពុជាចំនួន ២១ នាក់ កាលពីព្រឹកថ្ងៃទី២៩ ខែកក្កដា។ ឆ្លើយតបនឹងសំណួរអំពីមូលហេតុដែលសាធារណជនមិនបានដឹងអំពីករណីនេះទាន់ពេល នាយករដ្ឋមន្ត្រីកម្ពុជា ហ៊ុន ម៉ាណែត បានបង្ហោះសារពន្យល់លើបណ្តាញសង្គមនៅព្រឹកថ្ងៃដដែល។
លោកបានលើកឡើងថា ចាប់តាំងពីការប៉ះទង្គិចតាមព្រំដែនផ្ទុះឡើងនៅថ្ងៃទី២៤ ខែកក្កដា រាជរដ្ឋាភិបាលតែងតែផ្តល់អាទិភាពដល់ការការពារអាយុជីវិតរបស់កងទ័ព និងប្រជាពលរដ្ឋកម្ពុជា។ ដូច្នេះ រាជរដ្ឋាភិបាលបានខិតខំជំរុញឱ្យមានបទឈប់បាញ់ឱ្យបានឆាប់តាមដែលអាចធ្វើទៅបាន។ ក្នុងដំណើរការនេះ ការរក្សាការសម្ងាត់នៃព័ត៌មានយោធានៅសមរភូមិមុខមានសារៈសំខាន់ជាពិសេសចំពោះសុវត្ថិភាពទាហាន និងប្រសិទ្ធភាពនៃប្រតិបត្តិការយោធា។
នាយករដ្ឋមន្ត្រីបានសង្កត់ធ្ងន់ថា ចាប់ពីពេលដែលទាហានកម្ពុជាត្រូវបានចាប់ខ្លួន សុវត្ថិភាពអាយុជីវិតរបស់ពួកគេបានក្លាយជាកង្វល់ចម្បងរបស់រាជរដ្ឋាភិបាល។ ដោយសារនៅដំណាក់កាលដំបូងមិនមានព័ត៌មានច្បាស់លាស់អំពីស្ថានភាពរបស់ពួកគេ ការរក្សាការសម្ងាត់មានសារៈសំខាន់ជាពិសេស។ ការផ្សព្វផ្សាយព័ត៌មានអាចបង្កគ្រោះថ្នាក់ដល់អាយុជីវិតពួកគេ ឬធ្វើឱ្យការចរចាដើម្បីដោះលែងពួកគេកាន់តែស្មុគស្មាញ។
លោកបានពន្យល់ថា នៅពេលត្រូវជ្រើសរើសរវាងការជូនដំណឹងដល់សាធារណជន និងការការពារអាយុជីវិតទាហានដែលត្រូវបានចាប់ខ្លួន រាជរដ្ឋាភិបាលបានជ្រើសរើសការការពារទាហាន។ រាជរដ្ឋាភិបាលបានគ្រប់គ្រងព័ត៌មានដោយប្រុងប្រយ័ត្ននៅដំណាក់កាលដែលស្ថានការណ៍មិនទាន់ច្បាស់ ដើម្បីជំរុញការចរចា និងឱ្យទាហានវិលត្រឡប់មកប្រទេសវិញដោយសុវត្ថិភាពឱ្យបានឆាប់។ លោកបានច្រានចោលការចោទប្រកាន់របស់មនុស្សមួយចំនួនថា រាជរដ្ឋាភិបាលមានចេតនាលាក់ព័ត៌មាន ឬមិនខ្វល់ពីសុវត្ថិភាពអាយុជីវិតទាហាន។
នាយករដ្ឋមន្ត្រីបាននិយាយថា មេដឹកនាំយោធាជាន់ខ្ពស់កម្ពុជាបានទាក់ទងភាគីថៃភ្លាមៗបន្ទាប់ពីហេតុការណ៍នេះ ដើម្បីស្នើឱ្យដោះលែងទាហានដែលត្រូវបានចាប់ខ្លួនឱ្យបានឆាប់។
លោកបានបន្តថា រដ្ឋមន្ត្រីក្រសួងការពារជាតិ និងមេបញ្ជាការយោធភូមិភាគទី៤ កម្ពុជា ក៏បានបន្តទាក់ទងសមភាគីថៃ និងទាមទារឱ្យបញ្ជូនទាហានកម្ពុជាត្រឡប់មកវិញឱ្យបានឆាប់។ អគ្គមេបញ្ជាការកងយោធពលខេមរភូមិន្ទក៏បានស្នើសុំអគ្គមេបញ្ជាការកងទ័ពថៃ តាមរយៈអគ្គមេបញ្ជាការកងទ័ពម៉ាឡេស៊ីដែលសម្របសម្រួល និងតាមដានបទឈប់បាញ់ ឱ្យជួយជំរុញការដោះលែងនេះ។
លោក ហ៊ុន ម៉ាណែត បានបង្ហាញក្តីសង្ឃឹមថា កងទ័ពថៃនឹងបញ្ជូនទាហានកម្ពុជាទាំងអស់ដែលនៅស្ថិតក្រោមការគ្រប់គ្រងរបស់ខ្លួន ឱ្យវិលត្រឡប់មកប្រទេសវិញឱ្យបានឆាប់បំផុត។
អ្នកយកព័ត៌មាន៖ Nget Pisan
អ្នកកែសម្រួល៖ Zhao Yi
