ស្ថានីយទូរទស្សន៍ខេត្តព្រះសីហនុ ថ្ងៃទី៣១ ខែកក្កដា៖ នៅរសៀលថ្ងៃទី៣០ ខែកក្កដា លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា បានអញ្ជើញជាអធិបតីក្នុងពិធីចុះហត្ថលេខាលើកំណត់ត្រានៃកិច្ចពិភាក្សាស្តីពីគម្រោងរៀបចំផែនការមេសម្រាប់អភិវឌ្ឍកំពង់ផែព្រះសីហនុឱ្យក្លាយជាកំពង់ផែ និងមជ្ឈមណ្ឌលភស្តុភារថ្នាក់តំបន់។
ក្រសួងសាធារណការ និងដឹកជញ្ជូនកម្ពុជា និងការិយាល័យប្រចាំកម្ពុជានៃទីភ្នាក់ងារសហប្រតិបត្តិការអន្តរជាតិជប៉ុន (JICA) បានរៀបចំពិធីនេះរួមគ្នា។ លោក SANUI Kazumasa ប្រធានតំណាង JICA ប្រចាំកម្ពុជា បានចុះហត្ថលេខាតំណាងឱ្យភាគីជប៉ុន។
គម្រោងនេះរំពឹងថានឹងប្រើពេល ២៤ ខែ ដើម្បីរៀបចំផែនការមេសម្រាប់កំពង់ផែព្រះសីហនុ ដោយមានចក្ខុវិស័យដល់ឆ្នាំ២០៥០។ គោលដៅរយៈពេលវែងគឺអភិវឌ្ឍកំពង់ផែព្រះសីហនុឱ្យក្លាយជាកំពង់ផែ និងមជ្ឈមណ្ឌលភស្តុភារថ្នាក់តំបន់ បង្កើនប្រសិទ្ធភាពប្រព័ន្ធភស្តុភារកម្ពុជា កែលម្អប្រសិទ្ធភាពប្រតិបត្តិការ និងសេវាកម្មកំពង់ផែ និងពង្រឹងសមត្ថភាពប្រកួតប្រជែង។ ទិសដៅនេះក៏ស្របនឹងគោលដៅជាតិរបស់រាជរដ្ឋាភិបាលកម្ពុជាក្នុងការក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។
រៀបរៀងដោយស្ថានីយទូរទស្សន៍ខេត្តព្រះសីហនុ។
