កម្ពុជា និងសមាជិកដទៃទៀតនៃអាស៊ានបានពង្រឹងកិច្ចសហប្រតិបត្តិការអនុវត្តច្បាប់ឆ្លងដែនបន្ថែមទៀត ដោយផ្តោតលើការបង្ក្រាបជនសង្ស័យដែលរត់គេចខ្លួនទៅកាន់ប្រទេសផ្សេងក្នុងតំបន់។
ថ្មីៗនេះ កិច្ចប្រជុំកម្រិតខ្ពស់របស់ស្ថាប័នអនុវត្តច្បាប់អាស៊ានបានប្រព្រឹត្តទៅនៅទីក្រុងហាណូយ ប្រទេសវៀតណាម។ លោកឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ស សុខា បានដឹកនាំគណៈប្រតិភូជាន់ខ្ពស់ចូលរួម។ កិច្ចប្រជុំនេះរៀបចំដោយក្រសួងនគរបាលវៀតណាម ដោយមានតំណាងពីប្រទេសសមាជិកអាស៊ានទាំង ១១ និងលេខាធិការដ្ឋានអាស៊ានចូលរួម។
កិច្ចប្រជុំបានផ្តោតលើការពង្រឹងការចែករំលែកព័ត៌មាន និងកិច្ចសហប្រតិបត្តិការអនុវត្តច្បាប់ឆ្លងដែនរវាងប្រទេសសមាជិក ដើម្បីតាមរកជនសង្ស័យដែលរត់គេចខ្លួនពីប្រទេសមួយទៅប្រទេសមួយទៀត ព្រមទាំងផ្លាស់បូរបទពិសោធន៍ និងការអនុវត្តក្នុងការបង្ក្រាបឧក្រិដ្ឋកម្មឆ្លងដែន។
តំណាងចូលរួមបានពិភាក្សាអំពីបញ្ហានានាដែលពាក់ព័ន្ធនឹងនីតិវិធីច្បាប់ ការផ្លាស់បូរព័ត៌មាន និងការសម្របសម្រួលអនុវត្តច្បាប់ឆ្លងដែនក្នុងដំណើរការតាមរកជនសង្ស័យ ហើយបានអនុម័តលើសេចក្តីថ្លែងការណ៍រួមមួយ ដោយយល់ព្រមជាគោលការណ៍លើផែនការសកម្មភាពរួមគ្នាក្នុងការពង្រឹងកិច្ចសហប្រតិបត្តិការបង្ក្រាបជនរត់គេចខ្លួន។
យោងតាមព័ត៌មានដែលបានចេញផ្សាយដោយភាគីវៀតណាម ផែនការសកម្មភាពនេះនឹងផ្តោតលើការពង្រឹងកិច្ចសហប្រតិបត្តិការផ្នែកច្បាប់ ការផ្លាស់បូរព័ត៌មាន ការកសាងសមត្ថភាពអនុវត្តច្បាប់ និងការយល់ដឹងរបស់សាធារណជន ព្រមទាំងជំរុញឱ្យមានកិច្ចសហប្រតិបត្តិការកាន់តែជិតស្និទ្ធរវាងស្ថាប័នអនុវត្តច្បាប់នៃប្រទេសនានា។
លើសពីនេះ អាស៊ានក៏នឹងពង្រឹងកិច្ចសហប្រតិបត្តិការជាមួយដៃគូសន្ទនា ស្ថាប័ននៃអង្គការសហប្រជាជាតិ និងអង្គការអន្តរជាតិផ្សេងទៀត ហើយនឹងជំរុញជំនួយផ្នែកយុត្តិធម៌ព្រហ្មទណ្ឌ និងកិច្ចសហប្រតិបត្តិការធ្វើបត្យាប័ន ដោយអនុលោមតាមច្បាប់ជាតិរបស់ប្រទេសនីមួយៗ និងច្បាប់អន្តរជាតិ។
ភាគីវៀតណាមក៏បានស្នើឱ្យស្វែងរកការបង្កើតយន្តការតាមរកជនសង្ស័យឆ្លងដែនក្នុងតំបន់ឱ្យកាន់តែផ្លូវការ រួមទាំងការបង្កើតខ្សែទូរស័ព្ទទាន់ហេតុការណ៍ ការពង្រឹងការផ្ទៀងផ្ទាត់អត្តសញ្ញាណជនសង្ស័យ និងការប្រគល់ជនសង្ស័យឱ្យបានឆាប់រហ័ស ព្រមទាំងការប្រើប្រាស់មូលដ្ឋានទិន្នន័យរបស់អង្គការប៉ូលិសអន្តរជាតិ និងអង្គការប៉ូលិសអាស៊ាន ដើម្បីចែករំលែកព័ត៌មាន។