ថ្មីៗនេះ អគ្គនាយកដ្ឋានគយ និងរដ្ឋាករកម្ពុជា សហការជាមួយនគរបាលអន្តោប្រវេសន៍ បានបង្ក្រាបពីរករណីនៅអាកាសយានដ្ឋានអន្តរជាតិសៀមរាបអង្គរ និងអាកាសយានដ្ឋានអន្តរជាតិតេជោ ខេត្តកណ្តាល ដោយត្រួតពិនិត្យអ្នកដំណើរបរទេស ៣ នាក់ និងរឹបអូសសារធាតុសង្ស័យជាកូកាអ៊ីន និងកញ្ឆា។
ប្រតិបត្តិការនេះធ្វើឡើងតាមព័ត៌មានពីប្រព័ន្ធវាយតម្លៃហានិភ័យអ្នកដំណើរតាមផ្លូវអាកាស (GTAS)។
ករណីទីមួយកើតឡើងនៅអាកាសយានដ្ឋានអង្គរ។ ពេលត្រួតពិនិត្យអ្នកដំណើរបរទេសម្នាក់នៅសាលចេញដំណើរ ក្រុមការងារបានរកឃើញម្សៅពណ៌សសង្ស័យជាកូកាអ៊ីនប្រមាណ ១,៩៨៤.៨០ ក្រាម។
ករណីទីពីរកើតឡើងនៅអាកាសយានដ្ឋានតេជោ។ ក្រុមការងារបានត្រួតពិនិត្យអ្នកដំណើរបរទេសពីរនាក់ និងរឹបអូសសារធាតុរុក្ខជាតិស្ងួតសង្ស័យជាកញ្ឆាចំនួន ៩៧ កញ្ចប់ មានទម្ងន់សុទ្ធប្រមាណ ៤៨,២៥៧.៥ ក្រាម។
ក្រោយការស៊ើបអង្កេតបឋម អ្នកពាក់ព័ន្ធ វត្ថុតាង និងសម្ភារៈពាក់ព័ន្ធត្រូវបានប្រគល់ទៅនគរបាលប្រឆាំងគ្រឿងញៀន ដើម្បីបន្តចាត់ការតាមនីតិវិធីច្បាប់ជាធរមាន។ អាជ្ញាធរកម្ពុជាបានបញ្ជាក់ថា ប្រតិបត្តិការនេះបង្ហាញពីការប្តេជ្ញាប្រឆាំងឧក្រិដ្ឋកម្មគ្រឿងញៀនឆ្លងដែន និងរក្សាសុវត្ថិភាព និងសណ្តាប់ធ្នាប់សាធារណៈ។