បទប្បញ្ញត្តិដែលបានកែប្រែរបស់សិង្ហបុរីស្តីពីការវាយរំពាត់ចំពោះបទឆបោក បានចូលជាធរមានចាប់ពីថ្ងៃទី៣០ ខែធ្នូ ឆ្នាំ២០២៥ រួមជាមួយទោសជាប់ពន្ធនាគារ និងពិន័យជាប្រាក់។ សេចក្តីរាយការណ៍នេះពណ៌នាថា នេះជាលើកដំបូងដែលសិង្ហបុរីដាក់ការវាយរំពាត់ជាទោសសម្រាប់បទឆបោក។ សេចក្តីរាយការណ៍ក៏បាននិយាយថា ជាធម្មតា ក្រោយទទួលបីរំពាត់ គូទរបស់អ្នកត្រូវទោសអាចរបកស្បែក និងរយះសាច់។
យោងតាមច្បាប់វិសោធនកម្មច្បាប់ព្រហ្មទណ្ឌឆ្នាំ២០២៥ ដែលបានអនុម័តនៅថ្ងៃទី៤ ខែវិច្ឆិកា អ្នកប្រព្រឹត្តបទឆបោកជាក់លាក់ សមាជិកក្រុមឆបោក និងអ្នកជ្រើសរើសមនុស្សឱ្យក្រុមឆបោក ត្រូវប្រឈមការវាយរំពាត់ជាកាតព្វកិច្ចពី៦ដល់២៤រំពាត់។ សេចក្តីប្រកាសក្រសួងមហាផ្ទៃកំណត់បទឆបោកនេះថា ជាបទល្មើសតាមមាត្រា៤២០នៃក្រមព្រហ្មទណ្ឌ ដែលប្រព្រឹត្តជាចម្បងតាមមធ្យោបាយទំនាក់ទំនងពីចម្ងាយ។ ចំពោះបទជួយសម្រួលការឆបោកជាក់លាក់ដែលពាក់ព័ន្ធនឹងការលាងប្រាក់បានពីការឆបោក ដូចជាការផ្តល់គណនីធនាគារជួយលាងប្រាក់ ការផ្តល់ស៊ីមកាត ឬព័ត៌មានសម្គាល់ខ្លួនSingpass តុលាការអាចសម្រេចវាយដល់១២រំពាត់តាមឆន្ទានុសិទ្ធិ។ លក្ខខណ្ឌរួមមានចេតនា ឬការដឹងថាមធ្យោបាយនោះនឹងត្រូវប្រើសម្រាប់ការឆបោក ឬមធ្យោបាយនោះត្រូវបានប្រើក្នុងការឆបោកជាក់ស្តែង ហើយជនប្រព្រឹត្តដឹង ឬមានមូលហេតុសមហេតុផលឱ្យជឿថាវានឹងត្រូវប្រើសម្រាប់បទល្មើស និងមិនបានចាត់វិធានការសមហេតុផលដើម្បីទប់ស្កាត់ការប្រើសម្រាប់ការឆបោក។
យោងតាមទិន្នន័យក្រសួងមហាផ្ទៃដែលសេចក្តីរាយការណ៍ដកស្រង់ ចាប់ពីឆ្នាំ២០២០ដល់ឆមាសទី១ ឆ្នាំ២០២៥ ការខាតបង់ដោយការឆបោកលើស២,៨ពាន់លានដុល្លារអាមេរិក និងមានករណីរាយការណ៍រហូតដល់១៩ម៉ឺនករណី។
