(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា បានអញ្ជើញទៅគោរពវិញ្ញាណក្ខន្ធសព ឯកឧត្តម បណ្ឌិតសភាចារ្យ ច័ន្ទ សារុន អ្នកតំណាងរាស្ត្រមណ្ឌលតាកែវ នីតិកាលទី៧ នៃរដ្ឋសភា និងជាអតីតរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ ការអញ្ជើញគោរពវិញ្ញាណក្ខន្ធនេះ ធ្វើឡើងនៅថ្ងៃពុធ ៥រោច ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២ ខែកញ្ញា ឆ្នាំ២០២៦។
ឯកឧត្តម បណ្ឌិតសភាចារ្យ ច័ន្ទ សារុន បានទទួលមរណភាពកាលពីរំលងអធ្រាត្រឈានចូលថ្ងៃចន្ទ ទី៣១ ខែសីហា ឆ្នាំ២០២៦ វេលាម៉ោង ០០:២៩នាទី ក្នុងជន្មាយុ ៨១ឆ្នាំ ដោយជរាពាធ។ ឯកឧត្តម គឺជាអ្នកតំណាងរាស្ត្រមណ្ឌលខេត្តតាកែវ នីតិកាលទី៧ នៃរដ្ឋសភា និងធ្លាប់បំពេញតួនាទីជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ក្នុងឱកាសនោះ សម្ដេចអគ្គមហាសេនាបតីតេជោ ហ៊ុន សែន បានចូលរួមគោរពវិញ្ញាណក្ខន្ធ និងសម្តែងការរំលែកទុក្ខចំពោះក្រុមគ្រួសារសព ឯកឧត្តម បណ្ឌិតសភាចារ្យ ច័ន្ទ សារុន ព្រមទាំងបានបួងសួងដល់ដួងវិញ្ញាណក្ខន្ធសព សូមបានទៅកាន់សុគតិភព។ ការអញ្ជើញនេះក៏ជាការចូលរួមគោរពចំពោះឯកឧត្តម បណ្ឌិតសភាចារ្យ ច័ន្ទ សារុន ក្នុងពេលដែលក្រុមគ្រួសារកំពុងរៀបចំពិធីបុណ្យសព។ដោយ៖ សុភ័ក្រ្ត
