សម្ដេចធិបតី នាយករដ្ឋមន្រ្ដី បានណែនាំដល់និស្សិតដែលកំពុងសិក្សាវិជ្ជាជីវៈពេទ្យ ឱ្យផ្តោតសំខាន់លើការរៀនសូត្រ និងការអភិវឌ្ឍសមត្ថភាពវិជ្ជាជីវៈ ដើម្បីត្រៀមខ្លួនក្លាយជាបុគ្គលិកសុខាភិបាលដែលមានចំណេះដឹង និងជំនាញគ្រប់គ្រាន់។ សម្ដេចធិបតីបានសង្កត់ធ្ងន់ថា វិជ្ជាជីវៈពេទ្យត្រូវការការខិតខំប្រឹងប្រែង និងការទទួលខុសត្រូវខ្ពស់។
សម្ដេចធិបតី នាយករដ្ឋមន្រ្ដី បានលើកឡើងថា អ្នកប្រកបវិជ្ជាជីវៈពេទ្យត្រូវគោរពក្រមសីលធម៌ និងតម្លៃនៃវិជ្ជាជីវៈ ដោយយកអាយុជីវិត និងសុខភាពរបស់ប្រជាពលរដ្ឋជាចម្បង។ ដោយសារការងារផ្នែកសុខាភិបាលពាក់ព័ន្ធដោយផ្ទាល់នឹងសុវត្ថិភាពអ្នកជំងឺ និស្សិតត្រូវខិតខំសិក្សា និងពង្រឹងសមត្ថភាពឱ្យបានពេញលេញ មុននឹងចូលប្រឡូកក្នុងវិស័យនេះ។
ជាមួយគ្នានេះ សម្ដេចធិបតី នាយករដ្ឋមន្រ្ដី បានហាមដាច់ខាតមិនឱ្យនិស្សិតរៀនវិជ្ជាជីវៈពេទ្យតាមផ្លូវកាត់ ដោយមានគោលបំណងត្រឹមតែទទួលបានសញ្ញាបត្រ។ សម្ដេចធិបតីបានណែនាំឱ្យនិស្សិតផ្តល់អាទិភាពដល់ចំណេះដឹង ជំនាញ និងបទពិសោធន៍វិជ្ជាជីវៈ ព្រោះការអនុវត្តការងារផ្នែកសុខាភិបាលត្រូវការសមត្ថភាពពិតប្រាកដ និងការទទួលខុសត្រូវចំពោះអាយុជីវិត និងសុខភាពប្រជាពលរដ្ឋ៕
