កម្ពុជា និងប៊ុលហ្គារីចែករំលែកសិល្បៈ តន្ត្រី និងមិត្តភាព ព្រមទាំងរួមចំណែកពង្រឹងទំនាក់ទំនងវប្បធម៌រវាងគ្នា

ឯកឧត្ដម Chea Chanboribo ឯកអគ្គរាជទូតកម្ពុជាប្រចាំប្រទេសប៊ុលហ្គារីបានអញ្ជើញចូលរួមក្នុងការបើករដូវកាលថ្មីនៃវង់តន្ត្រីស៊ីមហ្វូនី វិទ្យុជាតិប៊ុលហ្គារី ដែលបានទទួលការអញ្ជើញពី អគ្គនាយកវិទ្យុជាតិប៊ុលហ្គារី (Bulgarian National Radio – BNR) ចូលរួមទស្សនាការប្រគំតន្ត្រី បើករដូវកាលថ្មីរបស់វង់តន្ត្រីស៊ីមហ្វូនីនៃវិទ្យុជាតិប៊ុលហ្គារី (BNR Symphony Orchestra) នាល្ងាចថ្ងៃទី ២ ខែតុលា ឆ្នាំ២០២៦ នៅ Bulgaria Hall ទីក្រុងសូហ្វៀ។

កម្មវិធីដ៏ពិសេសនេះ ដឹកនាំវង់តន្ត្រីដោយ Konstantin Ilievski និងមានការចូលរួមពី ក្រុមចម្រៀងចម្រុះនៃវិទ្យុជាតិប៊ុលហ្គារី (BNR Mixed Choir) ដឹកនាំដោយ Lyubomira Aleksandrova ព្រមទាំងសិល្បករឯកទេស Katalin Kramarics (Flute), Stefani Krasteva-Pavlova (Soprano) និង Maria Radoeva (Mezzo-soprano)។

ឯកឧត្ដមបានបញ្ជាក់ថានេះជាកិត្តិយសដ៏ពិសេសមួយសម្រាប់កម្ពុជា ដែលក្នុងចំណោមតំណាងការទូតបរទេស ឯកអគ្គរាជទូតកម្ពុជាតែមួយរូបត្រូវបានអញ្ជើញចូលរួមក្នុងឱកាសនេះ។ វាជាពេលវេលាដ៏មានតម្លៃក្នុងការចែករំលែកសិល្បៈ តន្ត្រី និងមិត្តភាព ព្រមទាំងរួមចំណែកពង្រឹងទំនាក់ទំនងវប្បធម៌រវាង កម្ពុជា និងប៊ុលហ្គារី។

វង់តន្ត្រីស៊ីមហ្វូនីនៃវិទ្យុជាតិប៊ុលហ្គារី គឺជាវង់តន្ត្រីស៊ីមហ្វូនីដ៏សំខាន់មួយរបស់ប្រទេសប៊ុលហ្គារី និងជាផ្នែកមួយនៃវិទ្យុជាតិប៊ុលហ្គារី។ វង់តន្ត្រីនេះត្រូវបានបង្កើតឡើងក្នុងឆ្នាំ ១៩៤៨ នៅទីក្រុងសូហ្វីយ៉ា និងបានចូលរួមចំណែកយ៉ាងសំខាន់ក្នុងការផ្សព្វផ្សាយតន្ត្រីបុរាណ និងស្នាដៃរបស់អ្នកនិពន្ធតន្ត្រីប៊ុលហ្គារី។

អស់រយៈពេលជាច្រើនទសវត្សរ៍មកនេះ វង់តន្ត្រីបានសម្តែងស្នាដៃតន្ត្រីពីអ្នកនិពន្ធល្បីៗទាំងក្នុងប្រទេស និងអន្តរជាតិ ហើយបានចូលរួមក្នុងការថតសំឡេង និងកម្មវិធីតន្ត្រីជាច្រើនរបស់វិទ្យុជាតិប៊ុលហ្គារី។ សកម្មភាពរបស់វង់តន្ត្រីក៏បានជួយភ្ជាប់ទំនាក់ទំនងវប្បធម៌រវាងប៊ុលហ្គារី និងប្រទេសផ្សេងៗ តាមរយៈតន្ត្រីផងដែរ។

បច្ចុប្បន្ន BNR Symphony Orchestra នៅតែបន្តរៀបចំការប្រគំតន្ត្រី និងកម្មវិធីសិល្បៈ ដោយនាំយកស្នាដៃតន្ត្រីបុរាណ និងស្នាដៃសម័យថ្មីទៅកាន់អ្នកស្តាប់។ វង់តន្ត្រីនេះក៏មានតួនាទីក្នុងការអភិរក្ស និងផ្សព្វផ្សាយបេតិកភណ្ឌតន្ត្រីរបស់ប៊ុលហ្គារី ព្រមទាំងលើកកម្ពស់ការយល់ដឹងអំពីវប្បធម៌ និងសិល្បៈប៊ុលហ្គារីនៅលើឆាកអន្តរជាតិ។

ដោយ៖ សុភ័ក្រ្ត