នាឱកាសសម័យប្រជុំលើកទី៦៣ នៃក្រុមប្រឹក្សាសិទ្ធិមនុស្សអង្គការសហប្រជាជាតិ (UN) នៅទីក្រុងហ្សឺណែវ កាលពីថ្ងៃទី២ ខែតុលា ឆ្នាំ២០២៦ លោក កែ សុវណ្ណ ឯកអគ្គរាជទូត និងជាតំណាងអចិន្ត្រៃយ៍កម្ពុជាប្រចាំការិយាល័យអង្គការសហប្រជាជាតិនៅទីក្រុងហ្សឺណែវ បានថ្លែងបទអន្តរាគមន៍លើរបៀបវារៈទី១០ ដោយបានលើកឡើងនូវចំណុចគន្លឹះសំខាន់ៗជុំវិញការលើកកម្ពស់សិទ្ធិមនុស្ស និងកិច្ចសហប្រតិបត្តិការអន្តរជាតិ៖
ការអំពាវនាវជួយជនភៀសសឹក កម្ពុជាបានស្នើឱ្យអង្គការសហប្រជាជាតិ និងសហគមន៍អន្តរជាតិ ផ្តល់ការគាំទ្រជាក់ស្តែងបន្ថែមទៀត ដើម្បីជួយដល់ជនភៀសសឹកកម្ពុជាជាង ២០ ០០០នាក់ ដែលរងផលប៉ះពាល់ពីជម្លោះព្រំដែន ឱ្យអាចវិលត្រឡប់ទៅកាន់លំនៅឋានដើមវិញដោយសុវត្ថិភាព និងប្រកបដោយសេចក្តីថ្លៃថ្នូរ។
បទពិសោធន៍ពីសង្គ្រាមរ៉ាំរ៉ៃ និងការបែកបាក់ជាតិក្នុងអតីតកាល បានធ្វើឱ្យកម្ពុជាកំណត់យក «សន្តិភាព ការអភិវឌ្ឍ នីតិរដ្ឋ និងសុខុមាលភាពរបស់ប្រជាពលរដ្ឋ» ជាស្នូលចម្បងក្នុងការការពារ និងលើកកម្ពស់សិទ្ធិមនុស្ស។
កម្ពុជាទទូចឱ្យការវាយតម្លៃណាមួយត្រូវប្រកាន់ខ្ជាប់នូវគោលការណ៍យុត្តិធម៌ តុល្យភាព មិនលម្អៀង និងផ្អែកលើទិន្នន័យជាក់ស្តែងដែលបានផ្ទៀងផ្ទាត់ត្រឹមត្រូវ។
លោកតំណាងអចិន្ត្រៃយ៍បានសម្តែងការសោកស្តាយចំពោះអនុសាសន៍មួយចំនួន ដែលទម្លាក់បន្ទុកទាំងស្រុងមកលើកម្ពុជា ទៅលើបញ្ហាស្មុគស្មាញដែលចាំបាច់ត្រូវមានការចូលរួមដោះស្រាយពីបណ្តាភាគីពាក់ព័ន្ធ និងកិច្ចសហប្រតិបត្តិការអន្តរជាតិ ជាអាទិ៍ បញ្ហាជនភៀសសឹកតាមព្រំដែនកម្ពុជា-ថៃ និងការបង្ក្រាបឧក្រិដ្ឋកម្មឆ្លងដែន។
ទន្ទឹមនឹងការលើកឡើងនេះ កម្ពុជាបានបញ្ជាក់ជាថ្មីនូវការប្តេជ្ញាចិត្តយ៉ាងរឹងមាំ ក្នុងការបន្តកិច្ចសហប្រតិបត្តិការជិតស្និទ្ធជាមួយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ដើម្បីបន្តលើកកម្ពស់សិទ្ធិសេរីភាព និងផលប្រយោជន៍របស់ប្រជាជនកម្ពុជា៕ ដោយ៖ ប៉ៃ សុឃីម
