ខេត្តព្រះសីហនុ៖ នៅថ្ងៃទី៩ ខែតុលា ឆ្នាំ២០២៦ កម្លាំងការិយាល័យនគរបាលចរាចរណ៍ផ្លូវគោក ដឹកនាំដោយលោកវរសេនីយ៍ទោ នី ចាន់ណារ៉ា នាយការិយាល័យនគរបាលចរាចរណ៍ផ្លូវគោក សហការជាមួយកម្លាំងការិយាល័យនគរបាលសណ្តាប់ធ្នាប់ និងតំណាងមន្ទីរសាធារណការ និងដឹកជញ្ជូនខេត្ត បានចុះផ្សព្វផ្សាយច្បាប់ចរាចរណ៍ និងណែនាំអ្នកបើកបររថយន្តក្រុងដឹកអ្នកដំណើរ និងរថយន្តតាក់ស៊ី នៅចំណតរថយន្ត ស្ថិតក្នុងសង្កាត់លេខ២ ក្រុងព្រះសីហនុ ដើម្បីពង្រឹងសុវត្ថិភាពធ្វើដំណើរក្នុងឱកាសបុណ្យកាន់បិណ្ឌ និងភ្ជុំបិណ្ឌ។
សកម្មភាពនេះ អនុវត្តតាមអនុសាសន៍របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ និងការណែនាំរបស់ឯកឧត្តម ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ។ មន្ត្រីជំនាញបានណែនាំអ្នកបើកបរឱ្យគោរពល្បឿនកំណត់ សញ្ញាចរាចរណ៍ សិទ្ធិអាទិភាព និងចៀសវាងការវ៉ាជែងក្នុងស្ថានភាពគ្រោះថ្នាក់ ព្រមទាំងបើកបរដោយការយោគយល់ និងប្រុងប្រយ័ត្នខ្ពស់។
ជាមួយគ្នានេះ អាជ្ញាធរបានសង្កត់ធ្ងន់ថា អ្នកបើកបរត្រូវចៀសវាងការបើកបរក្រោមឥទ្ធិពលគ្រឿងស្រវឹង និងសារធាតុញៀនជាដាច់ខាត ដើម្បីកាត់បន្ថយហានិភ័យនៃគ្រោះថ្នាក់ចរាចរណ៍ ការពារអាយុជីវិតអ្នកដំណើរ និងធានាសុវត្ថិភាពសាធារណៈក្នុងអំឡុងពេលប្រជាពលរដ្ឋធ្វើដំណើរទៅជួបជុំក្រុមគ្រួសារនាឱកាសបុណ្យប្រពៃណីជាតិខ្មែរ៕
